На Италијанецот Франческо Бањаја му беше доволно да биде меѓу најдобрите пет на последната трка сезонава во Мото ГП шампионатот, Големата награда на Валенсија, без разлика на пласманот на неговиот најголем конкурент, Шпанецот Хорхе Мартин.

Ова беше шестипат во 21 век да се решава прашањето за шампионот во „кралската класа“ на последната трка.

Бањаја успеа да ја одбрани титулата од минатата година, уште во шестиот круг во Валенсија Мартин испадна од трката.

Бањаја не сакаше да остави ништо на случајот и на крајот прв помина низ целта, што беше негова седма победа годинава.

Во конечниот пласман кај возачите Бањаја го освои првото место со 467 бодови, пред Мартин со 428, а трет заврши Италијанецот Марко Бецеки (329).

Кај конструкторите „Дукати“ ја освои првата позиција убедливо со 700 бодови, пред „КТМ“ со 370, трета е „Априлија“ со 326, „Јамаха“ освои 196, а „Хонда“ 185.