Австралискиот танчар со македонско потекло, Мајкл Дамески, повторно е во центарот на вниманието во светот на танцот. Овој 29-годишен уметник, чија семејна лоза води од Прилеп, ја доби главната машка улога во новиот видеоспот на Лејди Гага за песната „Abracadabra“.

Дамески, кој е роден во Сиднеј, ја сподели возбудливата вест на својот Инстаграм профил, објавувајќи фотографија со светски познатата пејачка, како и краток извадок од видеото.

„Кога сонот ќе стане реалност“, напиша тој во описот на објавата, споделувајќи го своето воодушевување од проектот.

Ова не е првпат Дамески да се најде во центарот на светското внимание. Во 2018 година, тој настапи во популарното шоу за танц „World of Dance“ (во превод: „Светот на танцот“), каде што со своите извонредни кореографски способности ја воодушеви светски познатата пејачка Џенифер Лопез и заврши на второто место, иако многумина го сметаа за фаворит.

Тогаш тој својата кореографија на песната „Lay Me Down“ од Сем Смит им ја посвети на своите баба и дедо од Македонија.

„Оваа кореографија има многу специјално значење за мене затоа што им ја посветувам на моите неверојатни баба и дедо. Преселувањето на другата страна од светот за да ги следиш твоите соништа носи многу тешки моменти, а за мене еден од нив е што не можам да ги видам моите баба и дедо онолку често колку што посакувам. Јас сум ова што сум поради нив“, напиша тој на Инстаграм.

Денес, Дамески живее во Лос Анџелес, каде што успешно ја гради својата кариера како танчар, кореограф и изведувач.