Кантри ѕвездата Кери Андервуд ја изведе песната „America the Beautiful“ на денешната инаугурација на Доналд Трамп. Полагањето заклетва на 47. претседател на Соединетите Американски Држави се одржа во ротондата на Капитол Хил поради зимските температури, пишува „Ролинг стоун“.

Облечена во кремаста тоалета, Андервуд ја исполни песната „а капела“ бидејќи се појавија технички проблеми со музичката снимка. По краткиот настап, таа ги поздрави присутните кои пееја заедно со неа и потоа се ракуваше со поранешниот претседател Џо Бајден, новоизбраниот претседател Трамп и потпретседателот Џеј Ди Ванс.

Одлуката на пејачката да ја прифати поканата да настапи на инаугурацијата на Трамп беше критикувана од некои обожаватели, особено од ЛГБТК+ заедницата, која често е таргетирана и маргинализирана од Републиканците. Андервуд јавно го поддржа истополовиот брак и во 2012 година изјави: „Како личност која е во брак, не знам како е да ти се каже дека не можеш да се ожениш/омажиш со некој што го сакаш и со кого сакаш да стапиш во брак. Не можам да замислам како би се чувствувало тоа“.

Во изјава, Андервуд рече дека ја гледа својата одлука да пее на инаугурацијата како чин на единство.

„Ја сакам нашата земја и ми претставува чест што бев повикана да пеам на инаугурацијата и да бидам мал дел од овој историски настан,“ изјави таа.