Во Москва синоќа се одржа руската алтернатива на Евровизија – Интервизија, а големиот победник е виетнамскиот пејач Дук Фук, кој со својата песна „Phu Dong Thien Vuong“ („Небесниот крал Фу Донга“) освои вкупно 422 поени од меѓународното жири.

Натпреварувањето се одржа во концертната сала „Лајв Арена“ пред повеќе од 11.000 гледачи, а го пренесуваше државната телевизија „Канал 1“. На сцената настапија изведувачи од над 20 земји, меѓу кои Белорусија, Кина, Куба, Индија, Казахстан, Саудиска Арабија и Србија.

Второто место го освои номадското трио од Киргистан со 373 поени, додека третата позиција ѝ припадна на Дана ал Меер од Катар со 369 поени.

За разлика од Евровизија, Интервизијата не дозволува гласање на јавноста, туку победникот го избира исклучиво жири составено од претставници на земјите учеснички.

Настанот, кој траеше три и пол часа, започна со обраќање на рускиот претседател Владимир Путин, кој порача дека фестивалот е симбол на зачувување на културниот идентитет.

„Почитувањето на традиционалните вредности и разновидноста на културите е основната идеја на натпреварот и ги инспирира учесниците да достигнат уметнички височини“, изјави Путин.