Во овој период од годината, градовите ширум Европа и светот се зафатени со украсување, сè со цел да го дочекаат декември во неговото најпразнично и најубаво руво, пишува „Путни кофер“.

Ни португалскиот град Агуеда не е исклучок од божиќната еуфорија. Тие и годинава додадоа празнична атракција, која го најде своето место во Гинисовата книга на рекорди. Најголемиот Дедо Мраз на светот се наоѓа токму во овој град и неговите улици ги краси од 2016 година.

Најголемата статуа на Дедо Мраз во светот е висока 21 метар, како седумкатница, и е осветлена со повеќе од 250 илјади светилки. Таа беше поставена на десниот брег на реката Агуеда на 18 ноември и ќе биде таму во 7 јануари следната година.

Иако се наоѓа во многу топол дел на Португалија, каде ни во зима не е премногу студено, жителите на Агуеда многу сериозно ги сфаќаат празниците. До огромниот Дедо Мраз се поставени празнични украси, а музичката група која изведува божиќни песни ѝ дава магична позадина.

Она што е најинтересно за повеќето посетители е фактот дека на само двесте метри од најголемиот Дедо Мраз се наоѓа и најмалиот Дедо Мраз на светот. Микроскулптурата е дело на британскиот уметник Вилард Виган, познат по создавањето прекрасни минијатури. Најмалиот Дедо Мраз на светот е толку мал што можете да го видите само под микроскоп.

Агуеда е град со околу 50.000 жители, кој се наоѓа во регионот Авеиро и е на околу 70 километри од Порто. Градот е најпознат по својата опуштена атмосфера, богатата културна понуда, традиционално изработената керамика и ткаените корпи… Тој е и регион со одлична гастрономија и добри вина.