Пред Соборниот храм „Свети Климент Охридски“ во Скопје денеска се одржа централното одбележување на Бадник. Кум оваа година е Божидар Јанковски, сопственик на „Дајнерс“, а здравичар е актерот Анастас Тановски.

Во своето обраќање денеска пред Соборниот храм Јанковски го честита празникот Бадник и порача да имаме разбирање за различностите, за секого во овој град, и да простуваме.

-Како бадникарски кум сакам да ве замолам да покажуваме добрини не само денес, не само на Бадник, туку секој ден во годината. Ве молам да се слушаме, да се гледаме, да се разбираме, да се почитуваме и да си помагаме, порача Јанковски.

Тој потсети дека е попско дете и се чувствува посебен пред овој храм и на овој ден.

-Јас сум попско дете. Мојот дедо бил поп и јас поради тоа се чувствувам посебен денеска пред овој храм и на овој ден. Сигурен сум дека мојот дедо поп Станко и мојата баба попадија Нана би биле денес горди на својот внук. Благодарам на сите за оваа приивлегија која ја имаме денес. Скопје е на сите родени во Скопје, но и на сите кои живеат во него. Таа различност на сите жители на Скопје го прави Скопје метропола. И тоа така засекогаш треба да остане, рече Јанковски.

Здравичарот Анастас Тановски во своето обраќање денеска посака здравје, среќа, светлина и топлина во нашите души и испрати порака да бидеме човечни и хумани.

-Пред некој ден ја испративме старата и ја дочекавме новата година. И еве дојде 6 јануари, денот Бадник кој го најавува утрешниот ден, големиот христијански празник Божиќ- Христовото раѓање. Што да си честитаме и посакаме за овие празници? Пред се, да си посакаме здравје, среќа, да си посакаме светлина и топлина во нашите души, да нема војна, завист и суета меѓу луѓето, да бидеме човечни и хумани, рече Тановски.

Градоначалничката на Град Скопје, Данела Арсовска во своето обраќање денеска посака оваа година да биде исполнета со здравје, хармонија, мир, среќа, радост. Градоначалникот на Општина Центар Горан Герасимовски посочи оти му е чест и задоволство што е дел од традиција кој постои 30 години.

И оваа година традиционално се одржаа Бадниковите поворки. Под слоганот „Почувствувај радост“ децата ја запејаа божиќната песна „Вечниот Бог“. Бадниковите поворки се одржаа во 75 градови и села во земјава и пет во дијаспората.

Централната манифестација во Скопје започна во 11 часот на плоштад „Македонија“. Учесниците од Камениот мост чекореа кон Соборниот храм „Св.Климент Охридски“ на топол прием и пригодно дарување кај Архиепископот Охридски и Македонски г.г. Стефан.

Во рамките на манифестацијата, беа поделени 2000 божиќни ѕвезди, кои ја симболизираат Витлеемската ѕвезда што им го покажала патот на Мудреците кон местото на Раѓањето на Богомладенецот.

Божиќниот концерт традиционално го предводеа Златните славејчиња во придружба на македонските поп-ѕвезди Вера Милошевска, Антониа Гиговска, Ламбе Алабаковски, Димитар Андоновски, Стефан (Некст Тајм) и Пере (Нокаут).

-Македонските улици по градовите и селата сè уште свежо се сеќаваат на божиќните каланди што се пееле под ова небо уште од средновековието. Токму тие се вистинскиот глас на Рождеството надвор од храмовите, а пак Бадниковите поворки кои ги преплавуваат улиците со детски насмевки се вистинската слика за Божиќ во Македонија, велат од Здружение за возобновување на православни традиции „Бадникови поворки“.