Со синоќешната драма пред Комунална Хигиена, кога со асистенција на полицијата од вработените кои протестираа беа извлечени камионите за смет и испратени на скопските улици да го соберат натрупаното ѓубре, скопјани кога се разбудија утрово мислеа дека ќе го видат „Градот убав“ и чист, но тоа не се случи или тече премногу бавно, под очекувањата на граѓаните.

Превирањата во јавното претпријатие и неизлегувањето на работниците да го соберат сметот ги поттикна градоначалниците на скопските општини од ВМРО-ДПМНЕ да излезат и самоиницијативно да го решаваат проблемот со сметот, со помош на камионите и механизацијата од другите блиски општини. Откако беа наполните неколку камиони во Кисела Вода и Аеродром навидум решениот проблем запна пред рампите на депонијата „Дрисла“ кога тие останаа спушените за паркираните камиони. Градоначалниците Тимчо Муцунски и Орце Ѓорѓевски почекаат 10 минути да се отвори депонија, па го истурија собраниот смет.

На другата страна на Скопје, во Бутел и лидерот на ВМРО-ДПМНЕ Христијан Мицкоски излезе заедно со градоначалникот Дарко Костовски лично да го следи собирањето на смет во таа општина и апелираше до надлежните органи и до владата да го решат проблемот со сметот.

-Апелирам до надлежните во Дрисла да не го попречуваат одлагањето на сметот, бидејќи соодветно на тоа, тие треба да го прифатат истиот и да си испорачаат фактура до општините. И од она кое што јас го знам, општините се подготвени тоа да го платат, тој трошок да го сносат иако тие не се надлежни за тоа, надлежно ЈП „Комунална хигиена”, но во интерес на скопјани, во интерес на сето она кое што се случува, општините иако немаат надлежност, сакаат да помогнат во оваа ситуација и надминување на оваа состојба во која што се, за жал, доведе градот Скопје, рече претседателот на ВМРО-ДПМНЕ, Христијан Мицкоски.

Сагата со скопскиот смет кулминираше кога градоначалничката Арсовска го обвини Мицкоски за „мафијашкиот“ бунт во Комунална хигиена каде, како што рече биле вработени од 30-40 лица од исто семејство и ги попречувале другите, над 1.000 вработени да си ги извршуваат своите должности.

– Заврши времето кога јавните претпријатија беа третирани како нечија лична приватна сопственост и наместо за интересот на граѓаните работеа во интерес на малкумина. За крај сакам да додадам и да му порачам на Христијан Мицкоски дека е разобличен вечерва за тоа што со бескрупулозноста за евтини политички поени сака да креира проблеми за граѓаните кои потоа се претставува дека ги решава и расчистува. Таквите политичари се најголемото ѓубре на градот кое ние ќе го исчистиме, порача  Арсовска.

Таа само најави дека Градот ќе се расчисти, но не кажа како ќе го реши проблемот со другите барања на вработените во Комунална хигиена кои побараа повисоки плати и исплата на К-15. Тоа веројатно ќе го каже директорката на јавното претпријатие Косана Мазнева Николиќ која ќе се обрати во 13 часот. Градоначалниците на скопските општини уште синоќа излегоа со иницијатива ЈП КХС да се укине поради нефункционалноста, и за хигената во градот да се грижат општините.

Полицијата веќе даде свој извештај за синоќешните случувања во „Комунална Хигиена“ наведувајќи дека отстраниле лице кои не биле вработени во претпријатието.

-На 09.07.2023 околу 22.00 часот во Полициска станица Гази Баба е пријавено дека во јавно претпријатие на подрачјето на Гази Баба дел од вработените одржуваат протест, а меѓу нив се и лица кои не се вработени во претпријатието. Од страна на полициски службеници веднаш е излезено на лице место, при што било констатирано дека околу 50 лица протестираат и ги попречуваат останатите вработени во извршувањето на работните обврски. Со полициска интервенција возилата ангажирани за собирање на сметот биле пропуштени да излезат од капијата, а лицата кои не се вработени, а биле затекнати во кругот на претпријатието ќе се соочат со законски предвидените поднесоци, соопшти МВР.

Во полицискиот билтен стои и уште еден инцидент од ноќеска кога вработен во Комунална Хигиена бил истепан во Гази Баба од колега кој го затекнал како си ја врши работата.

-Денеска (10.07.2023) во 00.05 часот на подрачјето на Гази Баба полициски службеници од Единицата за интервентна полиција при СВР Скопје го лишиле од слобода Ф.Ц.(28) од Скопје, вработен во ЈП Комунална хигиена Скопје, поради тоа што на 09.07.2023 околу 23.30 часот во трговски центар на подрачјето на Гази Баба, заедно со Д.Д. и уште неколку лица, физички го нападнале Д.С.(37) од Скопје, додека ги извршувал своите работни задачи како вработен во истото претпријатие. Се преземаат мерки за целосно расчистување на случајот и утврдување на останатите лица, а по неговото документирање од страна на Единицата за насилен криминал ќе биде поднесена кривична пријава за сторено кривично дело „насилство”, по член 386 од Кривичниот законик, стои во билетнот на МВР.

Иако многумина скопјани и поверуваа на Арсовска дека контејнерите експресно ќе се испразнат по бурната ноќ полна со превирања, обвинувања и пресметки, тие останаа полни до пладне кога се направени овие фотографии од нашиот фотограф Драган Митрески: