Во Воената академија „Генерал Михаило Апостолски“, денеска се одржа свеченост по повод заклетва на 28. класа студенти питомци. Запишани се 33 питомци од кои 25 од Македонија (19 мажи и 6 жени), пет питомци од Босна и Херцеговина и три питомци од Црна Гора.

На свечената заклетва присуствуваа претседателката на државата Гордана Сиљановска Давкова, министерот за одбрана Владо Мисајловски, началникот на Генералштабот на Армијата, генерал-мајот Сашко Лафчиски, заменик министерката за одбрана Елфет Исмаили, деканот на Воената академија, полковник Митко Богдановски и останати гости од воено дипломатскиот кор, од Армијата и Министерството за одбрана и роднини на питомците.

– Ви честитам на изборот, вашата работна кариера да ја посветите на Армијата, но првенствено на граѓаните, и на државата. И вие и ние заедно со вас почнуваме ново поглавје во вашите животи – истакна министерот Мисајловкси.

Тој порача дека питомците новото поглавје во својот живот го започнуваат во институцијата која има најголема доверба меѓу граѓаните. Тој додаде дека нивните први чекори се на Воената академија која е респектабилна високо образовна институција во широки рамки од која се излезени многу квалитетни офицери кои дале и даваат значаен придонес за афирмирање и развој на македонската Армија.

Мисајловски им посака добредојде на питомците од Црна Гора, и Босна и на сите им порача дека во наредниве четири години заеднички и посветено ќе ги совладувате тајните на воената професија, да се усовршат.

– Заедно во следните четири години ќе учите, ќе се обучувате и ќе придонесувате за развој на нашата соработката. Денес како питомци, а утре како офицери на Армии кои се грижат за безбедноста на своите сограѓани, пример за успех, пример за подготвеност, беспрекорно да ги совладувате предизвиците кои ни претстојат – додаде тој.

Претседателката Сиљановска Давкова на питомците им порача дека им претстојат тешки, но и интересни студии на една солидна академија.

– Во изминатите, речиси три децении, Воената академија „Михаило Апостолски“, израсна во почитувана институција, призната во регионални рамки, но и пошироко. Должни сме и понатаму да работиме на нејзиниот развој и напредок – порача таа.

На денешната свеченост се обрати и деканот на Воената Академија, полковник Митко Богдановски кој им порача дека воената професија не е лесна, но е благодарна и исполнета со достоинство.