Францускиот претседател Емануел Макрон денеска со сопругата Брижит ја посети катедралатa Нотр Дам во Париз, една недела пред нејзиното официјално отворање, чиешто реновирање беше завршено пет и пол години по пожарот.

На обиколката на катедралата присуствуваа и министерката за култура Рашида Дати и градоначалничката на Париз, Ан Идалго, додека јавноста делумно можеше да ја види внатрешноста на катедралата за првпат по завршувањето на работите, благодарение на преносот во живот на медиумите кои ја следеа посетата на претседателот.

„Истовремено е поправена, редизајнирана и обновена. Возвишено е“, рекол Макрон при влегувањето во катедралата.

Снимките емитувани во живо за време на посетата на Макрон на Нотр Дам ја прикажуваат внатрешноста на иконата катедрала како што верниците можеби ја доживеале во средниот век – нејзините широки, отворени простори исполнети со силна светлина што ги осветлува живописните бои на витражните прозорци, пренесува „АП“.

По пет години реконструкција, јавната институција за реконструкција на Нотр Дам во Париз проценува дека на реставрацијата на катедралата работеле речиси 2.000 луѓе, како и дека во проектот учествувале речиси 250 компании, која чинела вкупно 846 милиони евра, од кои значаен дел се донации.

Посетата на Макрон започнува низа настани кои водат до повторно отворање на ова готичко ремек-дело од 12 век за јавноста. Францускиот претседател повторно ќе дојде во Нотр Дам на 7 декември, кога ќе одржи говор, а следниот ден за време на свечената миса ќе присуствува на осветувањето на новиот олтар.

Администрацијата на Макрон ја поздрави реконструкцијата на Нотр Дам како симбол на националното единство и француската моќ.

Пожарот во катедралата Нотр Дам избувна на 15 април 2019 година околу 18:50 часот под покривот на зградата, а 15 часа подоцна беше изгаснат. Во пожарот изгореле покривот и кулата, а беше и тешко оштетена внатрешноста на катедралата, горните ѕидови и прозорците.

Катедралата Нотр Дам ќе биде отворена за јавноста на 8 декември 2024