Хрватската пејачка Нина Бадриќ е дива во секоја смисла на зборот. Пејачка со моќен вокал, грациозна на сцена, притоа со ретка смисла на хумор, со невидена аура, целосно предадена на публиката, ја сака и бескрајно ѝ е благодарна на возвратената љубов.

Во тој дух, Нина синоќа одржа концерт од светски рамки во Македонската филхармонија во Скопје. Облечена во црна долга тоалета, со која, како што рече, му оддава почит на овој храм на музиката, придружена од својот бенд, со интерпретацијата на песните „скрши“, но и „излекува“ многу срца во публиката, ја донесе до солзи, но и таа самата се расплака, понесена од возвратените емоции и љубов од присутните.

Концертот го започна со евергринот „Дани и године“, за да продолжи со своите стари хитови, но и нови песни. Секако, неизбежно беше да се испее и една песна од легендарниот пејач Оливер Драгојевиќ, прочуената „Скалинада“, за кого што рече, каде и да оди да настапува, насекаде го „носи“ Оливер со себе.

Видно понесена од емоциите на публиката која на нозе во глас ги пееше песните со неа, Нина во еден момент им се обрати на присутните:

„Скопје треба да се препише на рецепт. Вашата љубов ме лекува, поради неа сум жива.“

И продолжи да ги реди веќе добро познатите хитови како што се „Такви као ти“, „Рекао си“, „Додири од стакла“, дуетот што го сними со својот колега и голем пријател Петар Грашо „Немој“… Инаку, Нина со Масимо Савиќ во 2004 година сними обработка на песната „Странец во ноќта“ (Stranac u noći) за неговиот албум „Вјештина“, со која синоќа ја почести и македонската публика…

Нина раскажа и дека пред одржувањето на еден концерт во Сплит, еден новинар ѝ поставил неочекувано прашање со што ја збунил:

– Еден новинар ме праша. „Како е да се биде Нина, зошто е добро да се биде Нина Бадриќ“. Ме збуни со прашањето, па како е… и ми текна. Да се биде Нина Бадриќ е прекрасно поради тоа што сум толку сакана од публиката, поради количината на љубовта што ја добивам од вас – изјави емотивната Нина.

Публиката „гладна“ за уште повеќе музика, не ѝ дозволуваше на Нина да замине од сцената. Таа се врати на бис, со македонската песна „Не кажувај либе добра ноќ“, со што предизвика ерупција од емоции. И самата Нина не можеше да се воздржи, па се расплака среде сцената.

Концертот го заврши со евергрините „Да се опет теби вратим“ и „Чаробно јутро“.

Со длабоки поклонувања пред публиката, со солзи во очите и широка задоволна насмевка на лицето, праќајќи бакнежи и „срциња“, хрватската музичка дива замина, но со ветување дека ова не е крај меѓу неа и публиката, туку почеток…