Денеска најдобрата македонска кошаркарска репрезентација во својот последен натпревар од квалификациите за пласман на следното Европско првенство кое ќе се одржи оваа година триумфираше над Полска со 88:74 (26:16, 19:20, 22:16, 21:19).

Овој меч немаше никакво резултатско значење бидејќи нашите најдобри кошаркари ги загубија шансите за учество на Евробаскет 2025 после поразот од Естонија во минатото коло.

Пред трибините во СРЦ „Кале“ – Скопје избраниците на селекторот Александар Јончевски започнаа доста сигурно добивајќи ја првата четвртина со 26:16, иако Полјаците имаа подобар старт со водство од 4:0, па 6:3.

Дамјан Стојановски ја заврши репрезентативната кариера

Потоа ние ја презедовме контролата на паркетот, дојдовме за прв пат во позитива од 8:6, па успеавме истата да ја зголемиме на 13:10.

За прв пат нешто подоцна играчите на Јончевски дојдоа и до „плус пет“, а потоа за уште поголема радост за 23:16.

Иако втората четвртина ја добија гостите минимално со 20:19, во вторите 10 минути имавме одлични периоди во кои стекнавме и двоцифрени 29:19, подоцна и 33:23.

Полските кошаркари не дозволуваа нивната негатива да расте, па двапати се доближуваа на „минус пет“ (34:29, 36:31). На паузата нашата селекција водеше со 45:39.

Третата четвртина донесе уште поголема неизвесност, иако повторно доминиравме на паркетот добивајќи ги новите 10 минути со 22:16.

Полската селекција одигра уште подобро и за наши грижи имавме само еден „плус“ позитива на семафорот (48:47). Иако за момент се вративме на плус пет коша предност (52:47), дозволивме противникот да израмни со своја серија на поени за 53:53.

Но, од тој момент пред стартот на последната четвртина направивме одлична серија од 12:2 за 67:55.

Не се предаваа Полјаците бидејќи сега тие беа на ред со своја низа поени да се доближат на 69:66.

Македонските репрезентативци кога беше најпотребно ги консолидираа редовите, дојдоа до 73:66, а подоцна и повторно за двоцифрена разлика од 81:71 и тука веќе се најавуваше нашата победа.

Најефикасен во нашата репрезентација беше Шортс со 21 поен, пред Маслинко кој забележа 20 поени, Зекири 14, а Димитријевиќ 11. На спротивната страна Михалак и Плута имаа по 13 поени.