Македонската публика синоќа уште еднаш се потсети и со задоволство ги испеа безвременските моќни хитови на двете култни групи од југословенските простори ЕКВ и Парни Ваљак.

Емотивната и носталгична вечер, зачинета со тежок есенски дожд во Скопје создаде атмосфера за паметење и будење на стари спомени на генерациите кои растеа и се обликуваа со квалитетна рок музика, љубовна лирика и силно срочени стихови кои предупредуваа на промените на системот кои неминовно ќе дојдат и за бранот кој ќе го збрише сето она што со децении се создавало на овие простори.

Настапот на култната белградска група Екатерина Велика, покажа дека нивните песни живеат и 30 години по смртта на фронтменот, Милан Младеновиќ, а публиката од просторите на поранешна Југославија е желна одново на сцена да ги слушне „Земља“, „Круг“, „Срце“, “Љубав”, “Пар година за нас“…

Интересот за концертот на српскиот трибјут бенд „Деца из воде“ насловен „Како да беше пред 30 години – Милан Младеновиќ меморијал“ во организација на Авалон во спортската сала „Јане Сандански“ е доказ дека белегот кој ЕКВ го остави на југословенската рок сцена е траен и, барем во Скопје, регрутира нова, подмладена публика што препознава квалитетен звук, и ветува дека оваа музика ќе остане да се слуша и во наредните децении.

Зад тапаните се појави српскиот актер и поранешен член на ЕКВ Срѓан Жика Тодоровиќ, а најголемите хитови ги испеа гостинката Тања Јовиќевиќ од групата „Октобар 1864“.

Клавијатуристката на трибјут бендот Луна Шкопеља за момент како да ја оживеа трагично починатата членка на ЕКВ Маргарита Маги Стефановиќ.

Публиката ги врати на бис белградските музичари и уште еднаш ги запеаја легендарите „Круг“ и „Пар година за нас“.

Гостувањето во Скопје на ЕКВ трибјут бендот е дел од нивната есенска турнеја која почна од Белград, преку Нови Сад, Сараево до Подгорица.

По нив на сцената излегоа загребските музички ветерани „Парни ваљак“, а старите хитови кои ги испеа легендарниот пејач Аки Рахимовски, ги исполни неговиот наследник, младиот Игор Дрвенкар.

Бендот во Скопје, градот кој што го формираше Аки како музичар, ги претстави и новите песни, повторно во карактеристичниот стил на „Парни ваљак“ кои одлично беа прифатени од македонската публика.

-Моравме да продолжиме зошто ние не свириме за да живееме, ние живееме за да свириме. Но за таа наша приказна да продолжи понатаму мораше да се појави нов глас, а тоа е Игор Дрвенкар, рече лидерот на хрватската рок-група „Парни ваљак“, Хусеин Хасанефендиќ-Хус.

Дрвенкар ја вжешти атмосферата во салата цитирајќи ги стиховите кои ги испеа Рахимовски од мега хитот „Љубовна“: „Моје име није важно, јер је намјера то што чини разлику од човјека до човјека“ по што ја испеа на задоволство на скопската публика.

Рок хитовите и емотивните балади на двата бенда кои продолжуваат да ја оживуваат музиката и лириката по смртта на нивните фронтмени по кои станаа препознатливи покажуваат дека легендите и на овие наши балкански простории никогаш не умираат, се додека има публика која со задоволство и воодушевување ги слуша.