И македонската фолк-естрада отсега има своја вечер на популарноста, а се одржа сношти во Кочани, во ресторанот „Амор“, каде што настапија голем дел од најпознатите наши фолкери.

Благоја Грујовски, кој е дел од инцијаторите и организацијата, го водеше шоуто заедно со Ирена Спировска. Се доделија повеќе награди, а секој од пејачите, настапи во живо, заедно со групата „Круна“.

Маестро Милан Завков постухмно е добитник на наградата за животно дело, која ја додели композиторот Томислав Которчевиќ. Во чест на Завков, засвире хармоникашот Сашо Велков.

За животно дело, награди добија уште двајца доајени, Наум Петрески и Сузана Спасовска. Нивните настапи во живо се секогаш привилегија за слушање. Наградите одлично се поклопија и како тајмингот.

Наум ја доби во годината кога слави 35 години на музичката сцена. Сузана пак, првенката на ансамблот „Танец“, минатата година промовираше музички богат проект наречен „Приказна“, како одбележување 35 години на сцената.

Сузана Гавазова, тазе вратена од Австралија настапи при крајот на вечерта и беше поздравена со голем аплауз. Во публиката беше присутен нејзиниот сопруг Јасмин, ќерките Селена и Емили и нејзината сестра.

„Оваа награда ја посветувам на моето семејство кое секогаш ме поддржува“, рече Гавазова кога ја прими наградата за популарност.

Весел настап имаше и Јордан Митев кој е исто така награден, а публиката запеа заедно со него. Ленче и Горан Кукиќ се долги години активно дуо, затоа организаторите ги наградија и нив, а тие дополнително ја развеселија публиката.

Настапи и атрактивната Стојне Николова која исто така ја распеа публиката, како и Елена Андоновска. Тука бепше и Дамјан Стојановски, синот на покојниот Војо Стојановски, како и неговиот братучед, Влатко Миладиновски со кои запеа целата публика. Со награди се закитија и Цаки од групата „Кисми“, групата „Круна“, „Енерџи бенд“, Спасен Силјановски.

Наградите ги доделуваа познати личности од светот на музиката: авторот Григор Копров, музичарот Горјан Стојановски, кој е претседател на Здружението на естрадни уметници на Македонија, Борче Нечовски, кој е сега директор на ЗАМП, музичарот Бобан Мојсовски, авторот Орце Зафировски, градоначалникот на Кочани, Љупчо Папазов.

Во публиката, заедно со Григор Копров, како гостин беше дојден и Васил Тупурковски-Циле, претседателот на МОК.

Настанот го организираше ИМД продукција, а организаторот Иванчо Митев им ја додели наградата на Анета Мицевска и групата „Молика“ кои имаа впечатлив настап.

На крајот, запеа и Баже Грујовски заедно со Ирена Спировска рекоа дека би сакале оваа вечер да прерасне во традиција.