Големо количество отфрлено цвеќе, меѓу кое и стотина орхидеи, денеска биле фрлени во контејнери за отпад во скопската населба Аеродром, велат активистите од граѓанските иницијативи за намалување на прекумерното трошење и расфрлањето.

На две локации во населбата, контејнери биле полни со цвеќе, а дел од него активистите го „спасиле“, го пресадиле и му дале нов живот.

„Во групниот разговор кој го имаме од платформата „Yes for Less“, една девојка ни прати фотографија каде ни сподели дека има премногу цвеќе во контејнер и да споделиме да се спаси. Јас како @botanico.mk и неколку останати членови веднаш споделивме на нашите профили. Луѓето кои се љубители од мојата заедница по некое време почнаа да ми праќаат видеа со преку 100 растенија кои ги извадиле од тој контејнер. Потоа добив порака дека имало уште еден контејнер со цвеќе кај Бисер“, вели една од активистките кои успеале да спасат дел од фрленото цвеќе.