Кога ќе го направи првото официјално патување, „Иконата на морињата“ (Icon of the Seas) на „Ројал Карибиан Интернејшнал“ (Royal Caribbean International), ќе биде најголемиот брод за крстарење во светот, пишува „Би-би-си“.

Долг е неверојатни 365 метри што е иста должина како 35 автобуси и тежи 250.800 тони. Исто така, има 20 палуби и може да собере до 10.000 луѓе – вклучувајќи 7.600 патници.

И тоа не е сè, овој брод може да се пофали со многу интересни карактеристики. Најголемиот брод за крстарење на светот има најголем воден парк на море, има шест тобогани, седум базени и девет џакузи. Тука е и највисокиот водопад на море и парк полн со дрвја.

„Иконата“ треба да заплови во водите на Карибите во јануари 2024 година, акога ќе се случи тоа, тој удобно ќе собере околу 5.610 патници и 2.350 членови на екипажот.

Бродот ветува повеќе од 40 начини за вечера, пиење и забава, од кои многу се вклучени во цената за крстарење. Со 20 палуби и осум населби за истражување, идејата е да се грижи за секој тип на туристи, од области посветени на млади семејства, до простори само за возрасни, како што е првиот пијано бар „Ројал Карибиан Интернејшнал“.

Претседателот и главен извршен директор на „Ројал Карибиан Интернејшнал“, Мајкл Бејли, изјави за медиумите дека бродот е на пат да се приклучи на Кралската флота на Кариби на 26 октомври, пред неговото деби во 2024 година.

„Ројал Карибиан Интернејшнал“ ја претставува „Иконата на морињата“ како еволутивен врв на линијата за крстарење, користејќи ја најновата технологија и надоградувајќи се на 50-годишните знаења и искуства низ историјата на компанијата.