Вселенскиот телескоп Џејмс Веб откри џиновски космички прашалник во вселената што ги збуни научниците.

Тимот што управува со телескопот на Европската вселенска агенција објави слика што нуди најдетален поглед досега на две активно формирани млади ѕвезди кои се наоѓаат на околу 1470 светлосни години од Земјата во соѕвездието Вела, пренесува „Њујорк пост“ (Nypost).

Двете блескави ѕвезди, наречени Хербиг-Харо 46/47, биле видени опкружени со диск од материјал кој ги „храни“ додека растат милиони години.

Но, веднаш под нив, во позадината на неверојатната слика од длабоката вселена, се наоѓал објект кој наликува на огромен, црвен прашалник кој виси на ноќното небо.

„Веројатно се работи за далечна галаксија или галаксии кои потенцијално се во интеракција. Нивните интеракции можеби предизвикaле искривен облик на прашалник“, изјавиле за „Спејс.ком“ (Space.com) претставници на Научниот институт за вселенски телескоп во Балтимор, кој управува со научните операции на телескопот.

Претставниците објаснуваат дека црвената боја на објектите означува дека каков и да е објектот, веројатно е доста далечен. Можеби тоа е првпат објектот да биде набљудуван од луѓе.

Телескопот Џејмс Веб има неверојатни способности кои можат да прикажуваат објекти на неверојатни растојанија. Неговите блиски инфра-црвени слики со висока резолуција му овозможуваат да ѕирне во далечните краишта на универзумот, забележувајќи галаксии оддалечени дури 13,4 милиони светлосни години од нас, кои постоеле 420 милиони години по Големата експлозија.

„Ова можеби е првпат да го видиме овој конкретен објект“, велат претставниците.

„Ќе биде потребно дополнително следење за да се открие што е тоа со каква било сигурност. Веб ни покажува многу нови, далечни галаксии, така што треба да се направи многу нова наука!“