Во својот седми натпревар сезонава во Лигата на шампионите, во групата „А“ составот на Вардар 1961 вечерва во СЦ „Јане Сандански“ – Скопје загуби од Пик Сегед со 26:28.

Поведоа Унгарците со голот на десното крило Радивојевиќ, од иста позиција во петтата минута израмни Чупиќ. Противникот преку Бомбач брзо возврати за повторно минимална предност, но за нов егал се погрижи борбениот репрезентативен пивот Стоилов (2:2).

Се играше цврсто од двете страни во дефанзивниот дел, но пофокусиран барем во првите 10 минути од мечот беше гостинот, Кашпарек реализираше, а после блокираниот удар по обидот на Јотиќ, во контра казни Радивојевиќ со вториот негов гол.

Не беше најдобро искористено ни исклучувањето на Банхиди, се одлепи тимот на Пастор за првпат на „плус три“ (2:5), а после третиот гол на Кашпарек беше 4:7 во 13 минута од средбата.

Тешко се одеше преку бековската линија Чупиќ-Јотиќ-Дисингер, но помагаше кога е потребно Дибиров влегувајќи и реализирајќи како пивот. Почна да греши и Пик Сегед со неколку нереализирани напади, дојдоа и првите погодоци на Дисингер и Јотиќ, овој вториот за краток период дојде и до втор гол за израмнување 8:8, а на Дибиров дефинитивно му одеше како пивот, Русинот дојде и до четвртиот гол (9:9).

Не се предаваше гостинот, особено српскиот интернационалец Радивојевиќ кој исто така дојде до четвртиот гол овојпат од пенал, а голманот Ристовски и натаму не можеше да фати серија на одбрани (9:10, 20 мин.).

Унгарците сакаа многу брзо да ги решаваат нападите, но тоа не секогаш им успеваше, па имаа и непрецизни додавања, тоа во прав момент го искористи Вардар за пресврт со головите на Дисингер и Дибиров за 11:10 за „црвено-црните“.

Во 24 минута при 11:11 беше запишана и втората одбрана на Борко, па следуваше вториот гол на брзиот Чупиќ на веќе „традиционалната“ позиција десен бек на нешто повеќе од пет минути до паузата.

И Ристовски имаше реализација од гол на гол, унгарскиот претставник веќе почесто правеше грешки во своите напади, а Дибиров маестрален небранет од никого го постигна и шестиот гол за 15:12.

На стартот од вториот дел во својот прв напад Вардарци повторно беа на „плус три“ со третиот погодок на Јотиќ, а тешко се чуваа силните пикери на Пик Сегед, Банхиди реализираше и плус изнуди исклучување, плус две минути за Векиќ.

За среќа на домашните играчи, не беше намалена премногу негативата, Јотиќ продолжи да ја тресе мрежата на Миклер за 18:15 во 37 минута на мечот. Плејмејкерот на Вардар 1961 веќе се израмни и со Дибиров на листата на стрелци.

Се консолидираше одбранбениот дел на Унгарците кои правеа на граница и груби фаули, што ги натера играчите на Алушовски да кружат околу бедемот и не наоѓаше решение и за многу брзо се стопи позитивата и моментни 20:20 на семафорот.

Јотиќ се трудеше максимално, изнуди исклучување на Шоштариќ, но тоа не се искористи со реализиран пенал преку Дибиров, односно поуспешен беше Алиловиќ. Екс членот на Вардар, Кањелас потсети на неговите одлични соло акции, и повторно предноста беше на страната на гостите, но брзо израмни Валчак кој добро го замени Стоилов.

Се играше гол за гол, во последните 10 минути се влезе со нерешени 23:23, една-две грешки можеа да бидат клуч на мечот за конечниот исход, кога требаше да се израмни на 26:26, тоа не му успеа на Чупиќ го одбрани Алиловиќ на нешто повеќе од три и пол минути до крајот.

Хрватското десно крило за краток период не успеа уште еднаш и во следната минута, тоа се казни со голот на пивотот Банхиди за 25;27, остана уште малку време да се направи нешто повеќе.

Сите надежи на Вардар згаснаа со новиот погодок на Банхиди, по што започна и славјето на Пик Сегед за конечни 26:28.

Сезона 2020/2021

Лига на шампиони

Вардар 1961-Пик Сегед 26:28 (15:13)

Вардар 1961: Ристовски 1 (5 одб.), Кантегрел (1 одб.), Шеваљевиќ, Валчак 4, Стоилов 2, Георгиевски, Карапалевски, Дисингер 2, Јотиќ 6, Калараш 2, Гаџа, Чупиќ 3, Талески, Дибиров 6, Вујин, Векиќ.