ФОТО | Талентирани и енергични: Македонските претставници на детската Евровизија ја имаа втората проба на големата сцена во Мадрид
Нашите годинашни претставници на детската Евровизија, Ана Ванчевска и Алексеј Ивановски, ја имаа втората проба на големата сцена во Мадрид, Шпанија.
Препорачано
На фотографиите од пробата, објавени на официјалните инстаграм-профили на Ванчевска и Ивановски, можеме да видиме како ќе изгледа дуото за време на големото финале, кое ќе се одржи во сабота, на 16 ноември, со почеток од 18 часот. Нивните розово-црни костими се со потпис на македонската дизајнерка Елена Пандова, позната како Елена Лука.
Овие талентирани деца ќе ги бранат боите на Македонија со песната „Marathon“, чиј композитор е Лазар Цветковски, а текстот е дело на Магдалена Цветковска.
Нашите претставници ќе настапат со реден број 7, а годинава учествуваат 17 земји учеснички.
Европскиот радиодифузен сојуз и шпанскиот национален сервис, како домаќин на фестивалот, ветуваат одлична програма во рамки на ова престижно музичко натпреварување за деца. Како и секоја година, Македонската радио-телевизија ќе врши директен пренос на детската Евровизија.
Да потсетиме, минатата година победи француската претставничка Зои Клозјур со песната „Cœur“, меѓутоа Французите решија да ја отстапат организацијата бидејќи ова беше нивна трета победа во последите четири години. Франција беше земја-домаќин во 2021 и 2023 година.
