Средните училишта од градот Скопје, денеска и утре на плоштадот „Македонија“ одржуваат хуманитирен базар од рачни изработки, со цел собирање средства за лекување на болна ученичка од училиштето „Орце Николов“.

-Проектот беше инициран од Град Скопје, а на него се одзваа голем број скопски средни училишта. Секое средно училиште има свој посебен штанд, каде можат да се забележат најразлични рачни изработки- изјави наставничка од средното училиште „Васил Антевски – Дрен“ за „Слободен печат“.

Штандовите нудат најразлични производи и креации, од типот на рачно изработени орнаменти за домот, привезоци од рециклирана пластика, роденденски и љубовни честитки, домашни печива и десерти, книги на македонски и албански јазик, а посетителите имаат можност да се стоплат со чај и кафе.

Сите собрани средства од продажбата на производите ќе бидат наменети за Ана, ученичка од средното училиште „Орце Николов“, која има ретка мозочна болест и треба да патува на лекување во странство.

Настанот започна денеска и ќе продолжи утре, сабота, со почеток од 10.30 часот до 14.00 часот.