Анџело Онорато, сопруг на италијанската европратеничка Франческа Донато, е пронајден мртов во својот автомобил во Палермо. Иако се уште се утврдува причината за смртта, Франческа Донато веднаш се огласи со порака: „Го убиле мојот сопруг Анџело“.

Таа цело утро го бара Анџело, вознемирена бидејќи тој не одговарал на нејзините повици. На крајот успеала да му влезе во трага на автомобилот на нејзиниот сопруг, темно зелен теренец Land Rover, и повикала брза помош.

Анџело Онорато бил архитект и поседувал продавница за мебел во Палермо.

Според првите информации, околу вратот имал врзана пластична лента, пишува Кориере дела сера. Тој бил пронајден како седи на возачкото седиште. На телото не биле констатирани прострелни рани, но на кошулата била забележана крвава дамка.

Инспекторите не исклучуваат дека Онорато имал состанок со некого на локацијата каде што бил пронајден. Донато, која била сослушана во полиција, ги демантираше шпекулациите дека нејзиниот сопруг извршил самоубиство.

Инаку, 55-годишната Донато беше избрана во Европскиот парламент во 2019 година од партиската листа на Северната лига. Таа во Брисел се истакна со крајно евроскептичните ставови и противењето на единствената валута. За време на пандемијата, таа се спротивстави на вакцинацијата и рестриктивните мерки, а во 2021 година ја напушти партијата Северна лига.

Онорато се занимавал и со политика. Во 2022 година се кандидирал на сицилијанските регионални избори на листата на демохристијаните, но не беше избран. Неговите познаници биле шокирани од веста за неговата смрт, имајќи предвид дека ноќта пред смртта бил виден на забава во тениски клуб во Палермо.