Американскиот модел Софија Ричи (25) и нејзиниот сопруг Елиот Грејџ (30) го очекуваат нивното прво дете.

Една од највлијателните жени во 2023 година, барем кога станува збор за модните трендови, го откри полот на бебето во разговор за британското издание на модното списание „Вог“. Имено, Ричи и Грејџ ќе станат родители на девојче.

Двојката стапи во брак во април лани, а нивната венчавка беше една од најзборуваните во 2023 година. Тие направија свадбена церемонија во луксузниот француски хотел „du Cap-Eden-Roc“, а Ричи фасцинираше со три венчаници од модната куќа „Шанел“.

Девет месеци подоцна, тие имаат уште една убава причина за среќа.

„Дознав многу, многу рано – во четвртата недела од бременоста. Јас бев на патување во Милано за Модната недела и одев на ревијата на Прада. Тоа беше брзо 24-часовно патување и се чувствував ужасно, но не размислував многу за тоа. Мислев дека е поради летот“, раскажа Ричи за „Вог“.

Кога се вратила во Лос Анџелес, Ричи планирала да оди на концерт на Ед Ширан со сопругот и пријателите.

„Менструацијата ми доцнеше неколку дена и сакав да бидам сигурна, па направив тест. Елиот веќе беше навикнат на тоа дека одвреме-навреме си правам тестови за бременост“.

По венчавката, тие се обидувале да станат родители.

„Елиот беше толку возбуден. Зборувавме цел пат по телефон. Кога пристигна дома, тој беше како и секогаш – сладок човек кој сака да ги заштити моите емоции и очекувања, па некако ме седна и ми рече: „Ако се негативни, не се вознемирувај. Ќе дојде и нашиот момент’. Кога ги превртивме сите три теста за бременост, сите беа позитивни. Тој беше толку возбуден, а и двајцата плачевме. Беше лудо и поразително и толку тешко да не врескаш. Но, бидејќи бев во рана бременост, сакав да се заштитам – дури и пред пријателите“, раскажа манекенката.

Кога влегла во осмата недела од бременоста, тие им ја споделиле среќната вест на нивните родители.

Како и многу идни мајки, Ричи сфатила дека не го познавала своето тело пред нејзината бременост.

„Научив повеќе во изминатите шест месеци отколку во целиот мој живот. Особено за она за што е способно женското тело. Секоја недела носи нови нешта, без разлика дали станува збор за хормонални промени или проширување – толку е интересно да се доживее сето тоа“, раскажа таа.

Како потсетување, Софија Ричи и Елиот Грејџ се свршија во април 2022 година, а почнаа да се забавуваат во јануари 2021 година.

„Тие се пријатели со години, а Елиот е близок и со братот на Софија, Мајлс. На Софија ѝ е многу мило што излегува со некој што нејзиното семејство го одобрува и сака“, своевремено изјави извор близок до двојката.

ФОТО | Лајонел Ричи ја омажи помалата ќерка: Сменила три венчаници на „Шанел“, а свадбата ја направиле во луксузен француски хотел