При официјални посети на Ватикан или приватна аудиенција кај папата, непишано правило е жените да доаѓаат облечени во црно. Црната боја симболизира почит, понизност и сериозност пред светиот отец. Сепак, според протоколот на Ватикан, постои многу редок исклучок познат како привилегија на белото (il privilegio del bianco), што дозволува само избрани жени да носат бело пред папата.

Денес ова право го имаат само седум жени во светот, а тоа се католички кралици и принцези од европските кралски куќи Шпанија, Белгија, Луксембург и Монако.

Во Шпанија поранешната кралица Софија, која се сретнала со последните пет папи имала право да носи бело.

По абдикацијата на кралот Хуан Карлос, правото премина во рацете на кралицата Летиција, која за прв пат облече бело кога се сретна со папата неколку месеци откако стана кралица во 2014 година. Сепак, важно е да се напомене дека носењето бело не е задолжително – кралиците и принцезите со привилегија сами одлучуваат дали сакаат да носат бело.

Така, на пример, принцезата Шарлин од Монако, сопругата на принцот Алберт, иако има право да носи бело, последниот пат одлучила да носи црно, иако во минатото веќе носела бело.

Истото важи и за големата војвотка Марија Тереза ​​од Луксембург, која и покрај правото стекнато со бракот во 2000 година, избрала традиционална црна облека за средба со папата.

Оваа чест ја има и белгиското кралско семејство – право да носат бело имаат поранешната кралица Паола и сегашната кралица Матилда, кои го посетија папата Франциско во средината на септември 2023 година.

Но, привилегијата е строго резервирана само за католичките владетели и сопругите на католичките монарси. На пример, иако холандската кралица Максима остана католик откако се омажи за протестантскиот принц Вилем-Александар, таа нема право да носи бело пред папата.