Иако споделувањето на моменти од животот на децата е често со најдобри намери, тоа може да предизвика долготрајни несакани последици по нивната приватност и безбедност. Истражувањата покажуваат дека фотографии и видеа, споделени од родителите на социјалните мрежи, честопати завршуваат на несоодветни места на интернет, изложувајќи ги децата на ризици од злоупотреба на податоците, идентитетски измами и дигитална експлоатација.

Според проценките, до 2030 година, милиони деца би можеле да станат жртви на злоупотреба на нивните лични податоци како резултат на прекумерното споделување вакви содржини.

Уметникот Озбек Ајваз во соработка со Центарот за правни истражувања и анализи (ЦПИА) и Македонското здружение на млади правници (МЗМП), денеска организираше герила акција под наслов „Моето детство е моја приказна“, по повод 20 ноември – Светски ден на детето.

Уметничката инсталација, поставена кај фонтаната „Лотус“ во Градскиот парк во Скопје е симболичен потсетник дека секое дете заслужува приватен и безбеден простор за раст и развој.