Дури и во пандемиски услови Турција е атрактивна дестинација која ги мами туристите, а Истанбул, град полн со историја, секако е дестинација која се наоѓа на листата на желби на секој вљубеник во патувањата.

Иако е пролет, во Истанбул не дочека мошне студено време, сепак врвнежите од дожд и силниот ветар не не спречија да прошетаме низ неколку значајни центри на овој огромен космополитски град со 20 милиони жители.

Во време на ковид-криза и кога се функционира со протоколи во цел свет, ниту патувањата не се лесна работа, потребни се посебни процедури за влез во секоја земја, но Турција и сега е безбедна за патување, а за да влезете во земјата ви е потребен негативен ПЦР тест, како и претходно потполнет формулар за тоа каде точно ќе престојувате.

Без разлика на сите овие дополнителни формалности кои со себе ги носи коронавирусот, желбата за патување победи и нашата екипа го посети прекрасниот Истанбул.

Од повеќето места кои можевме да ги посетиме, кулата Галата, која веќе со децении го набљудува Истанбул од самиот врв, дефинитивно е историско архитектонско дело на кое мора да му се посвети внимание.

Видлива е од крајот на секоја улица која се протега од Каракој до познатата Истиклал Џадеси, а едноставно е невозможно е да го посетите овој град, а да ја избегнете оваа фасцинантна кула.

Кулата Галата е изградена во далечната 1938 година од трговците од Џенова, а во текот на својата историја во најголем дел служела за одбрана на градот и набљудување на морето, односно бродовите кои доаѓале од Златниот Рог.

Кулата со себе носи бурна историја, таа била разрушена, па повторно обновена, а денеска е една од најпосетуваните знаменитости во Истанбул.

Сепак, кога зборуваме генерално за што е она што најпрво треба да го посетите во Истанбул, а со себе носи испреплетена и богата историја, мораме да ја споменеме и Аја Софија, каде како што можевме да видиме, без разлика на пандемијата, сепак поголем број на верници редовно доаѓаат овде на молитва.

Аја Софија е поранешна православна базилика, која во текот на својата историја била претворена во џамија, подоцна во музеј, а денес повторно се користи како џамија.

Во минатото таа служела како византиска катедрала на Цариград (сегашен Истанбул), освен во периодот од 1204 до 1261 година, кога била претворена во римокатоличка катедрала по заземањето на градот од страна на крстоносците и основањето на Латинската Империја. Како џамија, објектот служел од 29 мај 1453 година до 1931 година, кога истата била затворена. Од 1 февруари 1935 до 2020 година служеше како музеј, а во јули 2020 година повторно е претворена во џамија.

Без разлика на тоа и денеска можете да ја посетите како туристи, а доколку со вас имате и локален водич кој и до најситните детали ќе ви го опише сето нејзино минато, гледајќи ги верниците како минуваат низ сите верски обреди за да му се помолат на Алах, тогаш ќе можете во целост да ја почувствувате сета нејзина магија.