Жена која девет години носеше „камено бебе“ починала од компликации, пишува „Дејли мејл“. Поради болки и грчеви во стомакот, проблеми со варењете и чудни звуци по јадење, 50-годишна жена по потекло од Конго се јавила на лекување во Њујорк. Таму лекарите откриле дека таа долги години носи „камено дете“ во стомакот, односно калцифициран плод кој престанал да се развива во 28-та недела од бременоста.

Иако специјалистите понудиле лекување за литопедија, состојба во која до бебето не стигнува доволно количина крв, што резултирало со неуспешна бременост, таа одбила третман бидејќи верувала дека некој  ѝ фрлил проклетство во Африка.

Овој редок феномен, кој е забележан помалку од 300 пати, се случува кога фетусот кој се развива надвор од матката ќе престане да се развива. Тоа е една од многуте компликации на бременоста кои можат да имаат сериозни долгорочни ефекти врз здравјето на мајката.

Жената починала 14 месеци подоцна поради неухранетост бидејќи, како што објаснуваат лекарите, „каменото бебе“ постојано ѝ ги притискало цревата, а телото повеќе не било во состојба да ги апсорбира виталните хранливи материи, што довело до губење на килограми.

„За жал, жената почина поради тешка неухранетост, опструкција на цревата поради литопедија и постојан страв да побара медицинска помош“, го коментирал нејзиниот случај Васеем Соус, стручњак за интерна медицина на Универзитетот САНИ апстејт медикал.

Во текот на бременоста, жената ја посетила лекарската клиника во бегалскиот камп откако забележала дека нејзиното дете повеќе не се движи. Гинекологот открил дека нејзиното бебе повеќе нема отчукувања  на срцето и дека мора да абортира, но поради обвинувањата од мештаните дека го убива веќе мртвото дете, жената на крајот се откажала од лекувањето.

Пациентката го одбила лекувањето велејќи дека верува дека нејзината здравствена состојба е поврзана со „магија“ што  ѝ ја направил некој во Африка.

Таа девет години го носела мртвиот фетус во себе и немала контакт со лекарите сѐ додека не се преселила во САД.

Терминот литопедија означува состојба која настанува кога бременоста се формира во абдоменот наместо во матката. Во случаи на литопедија, недоволно крв стигнува до бебето, што резултира со неуспешна бременост.

Телото, исто така, не може да го исфрли фетусот, ниту да го апсорбира ако е премногу голем, што доведува до потенцијално смртоносни компликации.

Имунолошкиот систем утврдува дека мртвиот фетус е закана и започнува напад.

Ова доведува до таложење на наслаги богати со калциум на фетусот, постепено обвивајќи го во калцифицирана обвивка или претворајќи го во камен.

Фетусите во оваа состојба можат да се носат во телото до 60 години, според медицинската литература.

Состојбата досега е забележана само 290 пати, а првиот случај датира од Франција во 1582 година.

Некои мајки пријавуваат сериозни симптоми како последица, но други можат да живеат со децении без никакви тешкотии.