Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува здрав и вкусен рецепт – намаз од целер.

„Намазот од целер брзо се подготвува, декоративен е со златна боја, здрав и вкусен“, вели Бобе.

Состојки за подготовка:

– поголем корен од целер
– јаболко
– 100 грама путер
– две сварени жолчки
– 1/2 помал кромид изрендан на ситно ренде
– сол и бибер по вкус

Подготовка:

Целерот и јаболкото се лупат и се сечкаат на ситни коцки. Во тенџере се растопува путер, се додаваат целерот и јаболкото за на тивок огин да се динстаат додека да омекне целерот. Оладените целер и јаболко се ставаат во блендер, им се додаваат варените жолчки, како и ренданиот кромид, солта и биберот. Се блендира се заедно и со тоа завршува подготовката на намазот од целер. По подготовката, се става малку во ладилник, па се служи.

На здравје!