На синоќешното доделување на наградите Еми, црвениот тепих не разочара, а ѕвездите сервираа раскош, гламур и смели модни избори. Од архивски скапоцености до новини од високата мода, сите најдоа начин да блеснат во својот полн сјај.

Црвениот тепих на Еми 2025 експлодираше синоќа со гламурозни изгледи, неочекувани модни изданија и беспрекорно избрани парчиња што оставаа без здив.

Секоја ѕвезда донесе своја верзија на елеганција, а стилистите го направија секој аутфит само по себе уметничко дело.

Џена Ортега се појави во креација на „Живанши“ и уште еднаш докажа дека сака да ризикува, носејќи драматичен топ покриен со камења и бисери што изгледаше како уметничка инсталација, во комбинација со елегантно црно здолниште.

Селена Гомез се одлучи за елеганција во огнено црвен фустан од Луј Витон, со едноставна силуета, но со впечатлив крој што додаваше доза на гламур.

Кетрин Зета-Џонс се одлучи за црна, суптилно транспарентна креација од Јара Шумејкер, која ја истакна нејзината фигура и нејзиниот софистициран сексапил.

Сидни Свини го избра Оскар де ла Рента, црвен сатенски фустан со драпирани детали на деколтето, со кој внесе стар холивудски шарм во модерен изглед.

Рита Ора блескаше во бел фустан од Миу Миу со длабоко деколте и висок шлиц, комбинација која зрачи со сензуалност и дрскост.

Кејт Бланшет, икона на стилот, пристигна во црно кадифено одело од Армани Приве со транспарентни детали и светкав ревер, во кое успеа да спои моќ и гламур во еден изглед.

Црвениот тепих на Еми наградите уште еднаш покажа дека телевизиските ѕвезди можат да се натпреваруваат со оние од филмските фестивали, модата и драмата секогаш одат рака под рака.