Пораст на платите во приватниот и јавниот сектор, минимална плата од 450 евра во првите сто дена од новата влада, исплата на трошоци за храна во висина од 20 проценти и исплата на трошоците за превоз, ограничување на работата на определено време во исклучителни околности и на максимум една година, право на неработна сабота и зголемена контрола на прекувремената работа, намалување на полното работно време на 35-часовна работна недела и укинување на 72-часовната работна недела на стратешките проекти, се барањата што Сојузот на синдикати на Македонија (ССМ) ги побара на денешниот протест по повод Меѓународниот ден на трудот.

Протестот започна пред зградата на Работничкиот дом во Скопје, потоа кон Собранието, па Министерство за правда, а заврши пред зградата на Владата.

Претседателот на ССМ, Слободан Трендафилов порача дека работниците даваат црвен картон поради обидот да се направи притисок врз синдикатите.

-Денеска ние работниците се собравме пред Работничкиот дом, домот кој сакаат да го конфискуваат од нас за да го уништат синдикалното движење. Работничкиот дом пред кој повеќе од 70 години ги започнувавме сите протести, сите штрајкови и денеска го започнуваме големиот работнички протест. Ние работниците дадовме црвен картон на судот заради тоа што направи обид да изврши притисок врз синдикатите да ги уништи, дозволи функционерска чизма на вратот на работниците за да молчат, да бидат понизни, тоа што го направија денеска го гледаме на дело. Ние синдикатите, ние работниците, ние граѓаните, пензионерите сме сите тука денеска за да покажеме дека колку повеќе не напаѓаат, толку посилни нѐ прават и колку повеќе пробуваат да ги уништат синдикатите ние се повеќе сме силни, порача Трендафиловски.

ССМ го заврши протестот пред Владата каде ги испорачаа барањата до идниот владин состав.

На денешниот протест не се приклучија 11 граѓански синдикати, меѓу нив СОНК, УПОЗ, Синдикатот за транспорт и врски и Синдикатот на станбено – деловни, комунални и водостопански организации. Од Конфедерацијата на слободни синдикати на Македонија рекоа дека ваквата одлука е затоа што во моментов има техничка влада.

Меѓународниот ден на трудот се празнува секој 1 мај и е посветен на борбата за зачувување и унапредување на правата на работниците. Овој празник се одбележува во знак на почит кон жртвите на штрајкот што се одржал од 1 до 4 мај 1886 година во Чикаго, организиран со цел воведување на осумчасовен работен ден.

Во знак на почит кон жртвите од штрајкот, Втората интернационала на Основачкиот конгрес во 1889 донесе декларација со која се повикуваат работниците од целиот свет на демонстрации на 1 мај со цел подобрување на својата положба.

Меѓународниот ден на трудот е државен празник во повеќе земји во светот.

Во државава има статус на државен празник и до 2006 година се празнуваше два дена, а од 2007 година се празнува само на 1 мај.