Првата дама на Украина, Олена Зеленска, вчера пристигна во Белград, во прва посета на висок украински функционер на Србија од почетокот на руската инвазија во 2022 година, што може да се прочита и како сигнал за оддалеченоста на Србија од Москва, негов традиционален сојузник.

Заедно со српската колешка Тамара Вучиќ и украинскиот министер за надворешни работи Дмитр Кулеба, кој исто така е во прва посета на Белград, Зеленска го обиколи градот и средновековната тврдина Калемегдан, пренесува агенцијата Танјуг.

Зеленска и Вучиќ ја посетија и градската библиотека во Белград, каде се наоѓа „Украинската полица“, дел од библиотеката со украински книги која е основана под патронат на првата дама на Украина.

Столиця Сербії власним прикладом довела, що життя та відновлення зрештою перемагають, а на місцях колишніх битв у місті-фортеці з’являються прекрасні парки. Дякую всім, завдяки кому ще одна велична пам’ятка – вже 84-та в нашому проєкті – зможе розповісти про себе українською. pic.twitter.com/2ZbXeh5miS

— Олена Зеленська (@ZelenskaUA) May 12, 2024

Веста за посетата на сопругата на Володимир Зеленски на Србија ја пренесоа речиси сите поголеми руски медиуми. На порталот на руската државна новинска агенција Риа Новости оваа вест е четврти најчитан текст. Судејќи според коментарите, Русите не се воодушевени.

„Срамно“ и „Ова е одвратно, ова е одвратно однесување на „пријателот“ на Русија“, се двата најпопуларни коментари.

Во реакциите на текстот читателите пишуваат дека Србија ја предала Русија, а го напаѓаат и српскиот претседател Александар Вучиќ. Ова се дел од коментарите на Риа Новости.

„Дали некој се плаши од нас освен Лукашенко? Дури и Киргистан се сврте. Нашата надворешна политика е донекаде слаба“.

„Прочитајте го Достоевски. За „браќата“ на кои ако им се укаже можност, ќе ни забијат нож во грб! Пример – Бугарија и Црна Гора“.

„Русија никогаш немала пријатели. Имаше само непријатели“.

„Кои се „пријателите“ што сè уште ги имаме? Папуанците од Полинезија? Или Северна Кореја?“.

Поради традиционалните историски, верски, политички и воени врски, проруските чувства се широко распространети во Србија. Српскиот претседател Александар Вучиќ се обидува да постигне рамнотежа меѓу кандидатурата на земјата за членство во ЕУ и врските со Русија и Кина, важни партнери и инвеститори.

Србија постојано ја осудуваше руската инвазија на Украина во Обединетите нации и други меѓународни форуми, но досега одбиваше да се приклучи на меѓународните санкции против Кремљ.

Вучиќ се состана со украинскиот лидер Володимир Зеленски три пати во 2022 година на меѓународни форуми во странство, последен пат на регионален состанок во Тирана во февруари.