Холивудската актерка Клои Грејс Морец и фотографката Кејт Харисон објавија дека се венчани. Морец, позната по улогите во филмовите „Кик-Ес“ (Kick-Ass) и „Лоши соседи 2“ (Bad Neighbours 2), и Харисон го изговорија судбоносното „да“ за време на викендот по повод Денот на трудот во САД. Радосната вест ја соопштија преку интервју за списанието „Вог“.

Двете носеа венчални креации и свечени тоалети од модната куќа „Луј Витон“, а Морец јавно му се заблагодари на уметничкиот директор за женска мода Никола Жескиер.

„Зборовите не можат да го доловат ова чувство. Се чувствуваме неизмерно благодарни. Вашата визија го направи нашиот ден уште посебен,“ напиша таа на Инстаграм.

Парот, кој е заедно веќе неколку години, но ретко зборува за приватниот живот, ја потврди својата свршувачка на 1 јануари годинава. „Вог“ присуствуваше на последното пробување на венчаниците во ателјето на „Луј Витон“ во Париз.

„Преплавени сме – во најдобра смисла,“ изјави Морец, додека Харисон додаде: „Тоа беше моментот кога сфатив дека сè е навистина реално.“

Морец избра сина венчаница, со која, како што рече, сакала да се оддалечи од традицијата.

„Никогаш не сум замислувала класична бела венчаница. Сакав нешто поинакво, нешто што ќе ми прилега и мислам дека токму тоа го добив,“ истакна актерката.

Харисон, пак, блескаше во бел корсет и здолниште со везови, дополнети со краток мрежест вел.

„Највозбудливо за мене, покрај самото венчавање, беше првиот момент кога ќе се видиме во нашите венчаници. Оваа креација ме прави подготвена – совршена е,“ изјави таа.

Инаку, пред Харисон, Морец беше во врска со Бруклин Бекам. Двојката имаше бурна, но медиумски изложена врска која траеше четири години, сè до нивното разделување во 2018 година. Истата година актерката беше фотографирана како ја бакнува Харисон во Малибу, што ги разбуди првите шпекулации за нивната романса. Иако долго време не зборуваа јавно за тоа, Морец во интервју за британските медиуми во 2022 година индиректно потврди дека има долгогодишна партнерка.