На социјалните мрежи се појави фотографија на која се гледа како полициските службеници самите не ги почитуваат новите сообраќајни правила.

На фотографијата се забележува група полицајци кои преминуваат на пешачки премин на булевар во Скопје, при што еден од нив зборува на телефон, а друг гледа во телефонот кој го држи во рака.

Ситуацијата е во судир со новите прописи во Законот за безбедност на сообраќајот на патиштата, кои од 27 септември забрануваат користење на телефони и други електронски уреди додека се преминува пешачки премин.

Претходно од МВР изјавија за „Слободен печат“ дека полицијата во Скопје во изминатите денови издала 63 опомени за граѓани кои ги прекршиле новите прописи, но дека сѐ уште нема парични казни додека граѓаните не бидат подобро запознаени со законот.

Во случајов, не е познато дали полицајците биле опоменати од колеги.

Нема казна за пешаци и велосипедисти со слушалка на едно уво?