Халк Хоган беше погребан на приватен погреб, опкружен со семејство и славни, блиски пријатели. Тој беше погребан на приватен погреб во Клирвотер, Флорида, во вторникот, 12 дена откако почина од срцев удар.

Семејството и пријателите на покојниот американски борач и икона на поп-културата се собраа да го прослават неговиот живот. Службата се одржала во Меморијалниот парк и погребален дом Силван Аби во Клирвотер, градот каде што Халк, роден како Тери Џин Болеа, живеел со својата сопруга Скај Дејли.

Фотографиите од погребот покажуваат мажи и жени во црно како го носат неговиот ковчег. Како што наведува магазинот „Пипл“, пејачот Кид Рок и комичарот Тео Ван, исто така, дошле на погребот.

На погребот присуствувала и поранешната сопруга на Халк, Линда Хоган.

Хоган почина од акутен инфаркт на миокардот, попознат како срцев удар, потврди магазинот „Пипл“. На денот на неговата смрт, голем број полициски и медицински возила беа видени пред куќата на Хоган, а познатиот борач беше пренесен на носилка до амбулантно возило.

Неговата смрт се случи само неколку недели откако неговата сопруга Скај ги негираше гласините за неговата сериозна здравствена состојба.

Халк Хоган беше една од најголемите ѕвезди во историјата на професионалниот кеч и човекот кој ја претвори Светската федерација за кеч (World Wrestling Entertainment) во глобален феномен.

Роден во Огаста, сојузната држава Џорџија, во 1953 година, Хоган имаше две деца, Брук и Ник, од првиот брак со сопругата Линда, со која се разведе во 2007 година. Во 2010 година се ожени со Џенифер Мекданиел, но и овој брак заврши со развод во 2022. Во 2023 година, Хоган стапи во брак со Скај Дејли.

Минатата година, во јули 2024, се појави на Националната конвенција на Републиканската партија, давајќи поддршка на претседателската кампања на Доналд Трамп.

Легендарниот борач Халк Хоган почина на 71-годишна возраст

Откриена причината за смртта на Халк Хоган