Камени алатки ископани во северозападна Кина им помогнале на мистериозна група луѓе да преживеат во студени и сурови услови пред помеѓу 50.000 и 60.000 години. Но, кој го направил тој алат? Одговорот на научниците би можел да ги потресе сите претпоставки за овој период од каменото доба, пишува „Си-ен-ен“.

Археолозите открија стотици камени предмети во црвеникава глина на локалитетот Лонгтан. Тие утврдиле дека алатките биле изработени во стил познат како кина, вообичаен за неандерталците, најблиските роднини на современите луѓе.

Сепак, она што ги збунува истражувачите е тоа што во Источна Азија не се пронајдени камени алатки како овие, ниту пак има докази дека неандерталците стигнале толку далеку на исток. Ова значи дека или овие алатки не требало да постојат во Лонгтан или некои разбирања за средниот палеолит и праисторискиот човечки вид се погрешни.

„Откритието на локалитетот Лонгтан е извонредно бидејќи ја документира оваа единствена традиција далеку, најмалку 7.000 или 8.000 километри од регионот поврзан со оваа праисториска индустрија“, изјави за „Си-ен-ен“ Дејвид Делпијано, постдокторски соработник на Универзитетот во Ферара и еден од авторите на студијата.

Неандерталците живееле во Евроазија околу 400.000 години, но исчезнале пред околу 40.000 години. Сепак, не се пронајдени остатоци од овој вид источно од Алтајските Планини.

Archaeologists unearthed a cache of stone tools. Neanderthals may have made them, study finds

Source: KVOA
https://t.co/8Zcm2nZJDf

Shared via the Google App

— marylynnjuszczak (@marylynnjuszcza) April 8, 2025

Коски и скелети на неандерталци досега се пронајдени во Западна Европа, заедно со камени алатки од стилот Кина, именувани по француската пештера Ла Кина. Археолозите го препишуваат овој стил на производство на камени алатки на неандерталската мустериска култура.

Можно е неандерталците да мигрирале толку далеку на исток и да стигнале до денешна Кина, но исто така е можно некои други човечки видови да изработувале камени алатки извонредно слични на оние произведени во Европа за време на средниот палеолит.

Меѓу алатите беа откриени стругалки, зашилени врвови, веројатно за копја, како и алатки слични на пила.

Анализата на древниот полен на локалитетот Лонгтан откри дека климата и животната средина во југозападна Кина пред 50.000 или 60.000 години биле слични на оние во Европа во тоа време. Сепак, во близина на алатите не се откриени животински остатоци, па затоа не е познато дали изработувачите на овие камени алатки ловеле и јаделе слични животни како неандерталците во Европа.

Студијата за ова откритие е објавена во списанието „Зборник на трудови на Националната академија на науките“.