„Попладнево се обратив на свеченото отворање на Почесниот македонски конзулат во Женева, Швајцарија – град кој претставува крстосница на дипломатијата, иновациите, финансиите и глобалното управување“, објави на „Фејсбук“ министерот за надворешни работи, Тимчо Муцунски.

„Пред новиот почесен конзул стои сериозна и одговорна задача. Очекувам Конзулатот да прерасне во значајна точка на поврзување со македонската дијаспора и да придонесе кон зајакнување на економските и културните односи на нашата земја со Швајцарија и пошироко со Европа“, напиша Муцунски, кој објави и фотографии од денешното отворање. Во објавата не е наведено името на почесниот македонски конзул во Женева, како ни имињата и функциите на другите луѓе на фотографиите.