Рајна Бубевска од битолското село Кажани со години се занимава со производство на градинарски култури. Како препознатлив белег на нејзиното производство се издвојува доматот од сортата „Воловско срце“, кој е ценет по својот квалитет и вкус. Рајна е долги години производител на градинскарски култури, пишува „Зелена берза“.

Патлиџанот од сортата „воловско срце“ е т.н. „старо семе“ – израз кој означува дека станува збор за сорта одгледувана локално со генерации, без вкрстување со други сорти. Според некои меѓународни документи, „воловското срце“ потекнува од Македонија, поточно од селото Марена кај Кавадарци. Оваа сорта меѓународно е позната како „југословенско/балканско воловско срце“, а според некои извори, потекнува од Србија или од Словенија. Доматите од сортата имаат исклучителен вкус и високо количество шеќер, а тие речиси секогаш се потешки од 300 грама. Најголемите патлиџани од оваа сорта, какви што ги одгледува вредната земјоделка Рајна од Кажани, имаат и повеќе од еден килограм.