Оскаровката Тилда Свинтон одржа моќен политички говор додека ја примаше наградата „Златна мечка“ за животно дело на отворањето на Берлинскиот филмски фестивал. Таа со остра критика истакна дека „нехуманото се случува пред наши очи“, пишува „Варајети“.

Во своето инспиративно обраќање, Свинтон го пофали Берлинале како „простор без граници, без политика на исклучување, прогон или депортација“. Филмот, според неа, е „голема независна држава“ која е „природно инклузивна – имуна на окупација, колонизација, преземање или приватизација“.

Потоа, без да навлегува во детали, упати моќна порака за глобалните случувања: „Државно спонзорирано и меѓународно поддржано масовно убиство активно тероризира повеќе од еден дел од светот. Ова се факти. Треба да се соочиме со нив“.

Со јасна критика кон светските лидери, таа додаде: „Јас сум тука да го именувам тоа, без двоумење и со непоколеблива солидарност кон сите што ја препознаваат неприфатливата рамнодушност на нашите алчни влади, кои се додворуваат на уништувачите на планетата и на воените злосторници, без разлика од каде доаѓаат.“

Оваа година, Берлинале се одржува во време на политички турбуленции, непосредно пред клучните избори во Германија на 23 февруари. Растот на десничарската партија Алтернатива за Германија, позната по своите антиимиграциски ставови, предизвика сериозни контроверзии.

Во меѓувреме, САД влегоа во вториот мандат на Доналд Трамп, а иако беше прогласен прекин на огнот во војната меѓу Израел и Хамас, конфликтот во Газа останува неизвесен. Само пред неколку дена, Трамп предложи преселување на Палестинците и трансформирање на Газа во „ривиера на Блискиот Исток“.

Фестивалот не бега од политичките теми. Претседателот на жирито, режисерот Тод Хејнс, исто така јавно го критикуваше Трамп, предупредувајќи дека неговото враќање на власт носи неизвесност за филмската индустрија: „Светот е во состојба на криза, не само во САД, туку и глобално.“

Да потсетиме, Тилда Свинтон има долгогодишна историја со Берлинале, настапувајќи во 26 филмови кои биле прикажани во рамки на овој филмски фестивал. Оваа значајна награда ѝ ја врачи режисерот Едвард Бергер.

„Тилда Свинтон е толку добра што многу режисери ја ангажираат двапати – освен Тод Хејнс, што треба да се смени,“ се пошегува Бергер, повикувајќи го Хејнс, кој работеше со Свинтон на филмот „Не сум тука“ за Боб Дилан.

Додека ги слушаше овие зборови, Свинтон беше видно емотивна, со солзи во очите.

Берлинале продолжува до 23 февруари.