Речиси 35 години подоцна, Арнолд Шварценегер и Дени Девито се сѐ уште „близнаци“.

Шварценегер (76) неодамна објави нова фотографија со неговиот колега Девито (79) и ќерката на Девито – Луси Девито (40) на сетот на бродвејската претстава „Ми треба тоа“ („I Need That“).

„Мој брате! Беше фантастично да се види Дени во Бродвеј во ‘Ми треба тоа’. Тој и Луси, но и сите вклучени, ја забавуваа публиката, која се смееше и уживаше во секој момент. Ова беше една од најдобрите претстави што сум ја видел, вистински спектакал со срце. Едвај чекам да работиме заедно повторно“, напиша Шварценегер на својот инстаграм-профил.

Да потсетиме, Шварценегер и Девито ги играа главните улоги во популарниот филм „Близнаци“ („Twins“) (1988).

На почетокот од 2022 година, актерите почнаа да работат на продолжението на комедијата, сега со работен наслов „Тројка“ („Triplets“). Но, целата продукција беше ставена на пауза поради смртта на оригиналниот режисер на филмот Иван Рејтман во февруари 2022 година.