Археолозите во близина на римскиот амфитеатар Колосеум, открија остатоци од луксузна куќа од времето на Стариот Рим. Во оваа куќа е откриен уникатен, живописен мозаик од школки, мермер и скапоцено стакло стар повеќе од 2.000 години, пренесува „Дејли мејл“.

Како што соопшти Министерството за култура на Италија,  на мозаикот се прикажани три големи бродови кои се упатуваат кон крајбрежен град, чии ѕидови се пробиени со мали кули и столбови, во сцена што сугерира дека сопственикот на куќата победил во некоја важна битка.

„Археолошкиот парк на Колосеумот, како дел од студија и истражувачки проект, ги извади на виделина просториите на луксузната куќа (домус) од доцната републиканска ера, која некогаш постоела на местото каде што во времето на Октавијан Август, неговиот зет Маркус Випсанија Агрипа ги изградил магацините на Агрипина, кои се наоѓале покрај улицата Викус Тускус“- се вели во соопштението на италијанското Министерство за култура.

Самиот домус имал неколку ката, веројатно со тераси. Се претпоставува дека имала три градежни фази и настанала помеѓу втората половина на 2 век п.н.е. и крајот на 1 век п.н.е. Структурата била изградена околу атриум, а главниот дел бил како сала за банкети слична на пештера. Просторот се користел во текот на летната сезона и бил украсен со спектакуларни игри со вода благодарение на преминувањето на некои оловни цевки меѓу украсените ѕидови.

„Она што го прави откритието извонредно е ѕидот покриен со таканаречениот рустикален мозаик, на кој му нема рамен според хронологијата и сложеноста на прикажаните сцени. Мозаикот е направен со употреба на различни видови школки, египетски сини плочки, скапоцено стакло, мали парчиња бел мермер и други видови камен, забен камен и вулканска пепел врзани со малтер“, се вели во соопштението.

На сцените, помеѓу лисјата од лотос и винова лоза има куп оружје со келтски воени труби, трозабеци и воени бродови, што веројатно укажува на двојниот триумф, и на море и на копно, на сопственикот на овој домус. Како што се дознава, сопственикот веројатно имал аристократско потекло и чин на сенатор.

„По повторното отворање на ‘Домус Тибериана’, како и подобрувањето на пристапноста на амфитеатарот, срцето на Рим откри автентично богатство за кое ќе бидеме одговорни, ќе го заштитиме и ќе го направиме достапно на јавноста штом е возможно“, додаваат од министерството за култура.

Ова откритие е во целосна спротивност со неодамна откриениот затвор-пекара во Помпеја, која укажува на најсуровата и најбруталната страна на животот во Римската империја.

ФОТО | Стара 2.000 години: Во Помпеја е откриена фреска на која е насликана пица