Илјадници граѓани го преплавија центарот на Мадрид во неделата, одговарајќи на повикот на Народната партија (ПП) за демонстрации против владата на социјалистичкиот премиер Педро Санчез.

Под слоганот „Мафија или демократија“, демонстрантите побараа распишување предвремени општи избори, поради низа обвинувања за корупција што влијаат и на владејачката Социјалистичка партија (PSOE) и на блиски роднини на премиерот.

Според делегацијата на регионалната влада, учеството се движело помеѓу 45.000 и 50.000 луѓе, додека организаторите рекле дека имало 100.000.

Притисокот врз владата се интензивираше во последните денови откако поранешен функционер на Социјалистичката партија беше обвинет за обид за оцрнување на Цивилната гарда, која истражува случаи во кои се вклучени сопругата на премиерот, Бегона Гомез, неговиот брат, Давид Санчез, и поранешниот министер за транспорт, Хозе Луис Авалос.

Леире Дијаз, која ја напушти партијата по протекувањето на аудио-снимката, негираше каква било вмешаност со премиерот, велејќи дека подготвувала книга за корупција.

Лидерот на народната партија (ПП), Алберто Нуњез Фејо, повика на „револуција на пристојност и слобода“, и на улиците и на гласачките места.

„Господине Санчез, престанете да се криете и лажете. Никој не гласаше за оваа ситуација – дури ни вашите поддржувачи“, нагласи тој.

Од своја страна, премиерот Санчез зборуваше за „кампања на вознемирување и заплашување“ против него и неговата сопруга, нагласувајќи дека неоснованите обвинувања се насочени кон негов личен и политички колапс.