Кралот Чарлс Трети и кралицата Камила пристигнаа во Рим, каде што ја започнаа својата прва официјална посета на Италија по крунисувањето.

Само неколку часа по слетувањето, беа фотографирани во близина на нивната резиденција, во близина на древниот аквадукт Аква Клаудија, пишува „Телеграф“.

Кралицата беше облечена во елегантен бело-беж фустан дизајниран од Ана Валентина, украсен со брош во форма на ѓурѓевак, симбол на љубовта кој некогаш ѝ припаѓал на кралицата мајка.

„Со голема радост ја започнуваме нашата прва посета на Италија како крал и кралица и ја славиме нашата дваесетгодишнина од бракот на ова прекрасно место – заедно со неверојатни луѓе!“, напиша кралскиот пар во објава на социјалните мрежи.

Инаку, оваа посета е историска – кралот Чарлс ќе биде првиот британски монарх што ќе се обрати пред двата дома на италијанскиот парламент. Програмата вклучува и аеромитинг на кој ќе настапат прочуените „Црвени стрели“, акробатскиот тим на Кралското воздухопловство. Исто така, кралот исто така ќе се сретне со претседателот и премиерката на Италија.

При слетувањето на аеродромот Чампино во Рим, кралскиот авион беше придружуван од два италијански воени авиони Ф-35. На црвениот тепих ги дочекаа почесната гарда и претставници од двете земји, меѓу кои и британскиот министер за надворешни работи, Дејвид Лами.

Кралицата Камила, во темносин фустан од дизајнерката Фиона Клер, изјави дека е „воодушевена што повторно е во Италија“.

Четиридневната посета на Рим и Равена ќе биде збогатена со културни активности, меѓу кои и посета на гробот на Данте Алигиери и музејот на лорд Бајрон. Локалните медиуми пренесуваат дека во Равена владее вистинска еуфорија поради доаѓањето на британскиот кралски пар.