Контроверзниот актер Арми Хамер неодамна пристигна во Хрватска поради снимањето на филмот „Темниот витез“ („The Dark Knight“) на режисерот Уве Бол, а сега на социјалните мрежи откри дека ужива со музика од регионални изведувачи.

На својата инстаграм-сторија сподели дека ја слуша песната „Real Slavs“ на хрватската група „Kuku$ klan“ и македонскиот трапер Дон Плеја.

„Каде можам да ја поднесам својата пријава?“, напиша актерот.

armie hammer kukus fan reveal?!? pic.twitter.com/OfV1FbQz1H

— ana²⁸??? (@harrysburek) February 4, 2025

Хамер стана славен со улогите во филмовите „Нарекувај ме по твоето име“ („Call Me By Your Name“), „Осамениот ренџер“ („The Lone Ranger“), „Социјална мрежа“ („The Social Network“) и многу други, но пред неколку години неговата кариера доживеа крах. Во 2021 година, неколку жени го обвинија актерот за сексуално злоставување и канибализам, по што повеќе не добиваше улоги во филмови.

Сепак, во последно време доби неколку шанси за враќање во светот на глумата.  „Темниот витез“ се снима во Хрватска, а Хамер ќе глуми одмаздник кој се бори против криминалот.

Хамер неодамна зборуваше за своето доаѓање во Хрватска.

„Кога ме ангажираа за овој филм, се јавив на неколку пријатели од Европа и им реков дека ќе снимам филм во Хрватска. Сите ми одговорија дека Хрватска е прекрасна и дека ќе ми се допадне. Ги прашав дали биле тука во јануари, а сите ми рекоа дека одат во Дубровник напролет и лето, па затоа сум сигурен дека ќе морам да се вратам“, изјави тој за „Нова“.

Режисерот Уве Бол откри зошто одлучил да го ангажира Арми Хамер и покрај сите обвинувања против него.

„Забележав дека има проблем и не добива ангажмани, па тоа беше можност да му понудам улога во мојот филм и тој прифати. Тоа е одлично бидејќи тој е вистинска ѕвезда и ќе го носи филмот“, изјави Бол.