Иницијативата „Сапорт Кочани“ објави фотографии од донации, дел од кои од Македонци што живеат во странство а испратиле полн куфер со најпотребните силиконски лепенки за повредените. Тимот на „Сапорт Кочани“ веќе ги предал овие лепенки на медицинските лица во Општата болница Кочани.

Како што објаснуваат од „Сапорт Кочани“ мултифункционалната маса која е донација за физикалното одделение е една од донациите што најмногу помагаат за рехабилитацијата на повредените во пожарот во дискотеката „Пулс“.

Организираноста и иницијативноста на „Сапорт Кочани“ е од огромна помош за околу 200 повредени лица кои што се здобија со повреди и изгореници во пожарот од 16 март. Иницијативата собира пари, но и се што е потребно за повредените во трагедијата. Нивните контакти со фирми, физички лица, се покажаа како исклучително корисни за кочанчани кои се наоѓаат во тешка состојба после најголемата трагедија во поновата македонска историја.