Дева Касел, 21-годишната ќерка на Моника Белучи и Венсан Касел, заедно со нејзиниот партнер, италијанскиот актер Саул Нани (24), блесна на црвениот тепих за време на премиерата на серијата „Леопардот“ („The Leopard“), каде што и двајцата имаат улоги.

Појавата на младиот пар не остана незабележана – нивната хемија и самоуверен став го привлече вниманието на јавноста, а многумина ги споредија со славните родители на Дева во нивните помлади години.

Дева, која со години е присутна во светот на модата, на социјалните мрежи сподели искуства од снимањето на „Леопардот“, откривајќи дека проектот ѝ бил повеќе од актерска ангажираност.

„Пред две години поминавме шест месеци оживувајќи го ‘Леопардот’, не само како приказна, туку и како љубовно писмо до оваа земја. Овој проект ме научи многу повеќе од очекуваното – за уметноста, историјата и неверојатните луѓе. Но, среде сето тоа, запознав некого кој стана моето сидро на ова патување…“, напиша таа покрај фотографии од снимањето.

Иако јавноста најпрво ја запозна како ќерка на две икони на филмската индустрија, Дева Касел со сопствен чекор се пробива на големата сцена. Неодамна беше едно од заштитните лица на „Долче & Габана“ на Модната недела во Милано, а веќе неколку години успешно гради кариера во модниот свет.

Со улогата во „Леопардот“, младата Дева покажува дека покрај модните писти, и филмската сцена може да биде нејзина следна дестинација.