Неколку косовски медиуми утрово објавија дека два камиони кои ја сочинуваа барикадата во месноста Дудин Крш во северниот дел на Митровица, изгореле во текот на минатата ноќ.

Како што јавуаат известувачите од местото на настанот, пожарот е изгаснат, меѓутоа предизвикана е значителна материјална штета.

Причините за пожарот сé уште не се познати, а од полицијата во регионот Север велат дека случајот кај нив не е пријавен.

На лице место се наоѓаат повеќе медиумски тимови, но не и полицијата, додека два џипа на Мисијата на ЕУ за владеење на правото во Косово, ЕУЛЕКС, накратко го посетиле местото.

Камионите беа поставени на споменатото место на 27 декември и се последната блокада што косовските Срби ја подигнаа во северниот дел на Косово, на патиштата кои водат кон границата со Србија.

Палењето се случи токму на денот кога се очекува да се отстранат барикадите од четирите општини во северно Косово населени со мнозинско српско население, Северна Митровица, Звечане, Зубин Поток и Лепосавиќ.

? 1/ As Serbs in north of #Kosovo have announced that removal of barricades will start today, two trucks which have been put in a barricade near Zvecan have been burned last night.

Circumstances remain unclear for now. pic.twitter.com/op3CjC9DcF

— Balkan Insight (@BalkanInsight) December 29, 2022

Веста за отстранувањето на барикадите е објавена по синоќешната средба на претседателот на Србија, Александар Вучиќ со претставници на косовските Срби.

Отстранувањето на барикадите беше условено со ослободувањето на поранешниот припадник на полицијата на Косово, Дејан Пантиќ, кој беше уапсен под сомнение дека организирал напади врз општинските изборни комисии и полициски патроли во северно Косово.

Пантиќ е ослободен вчера, откако 30-дневниот притвор му се замени со домашен притвор.