Вечерва во реванш натпреварот од квалификациите за пласман во групната фаза на ЕХФ Европската лига екипата ракометарите на Алкалоид загуби минимално со 29:28 од Хановер-Бургдорф.

Желни за докажување, РК Алкалоид одигра борбен меч со динамика типична за Бундеслигата. Германците ја прифатија оваа игра и публиката имаше ретка шанса да ужива во брз ракомет со сите убавини и недостатоци што таквата игра ги носи.

Германскиот претставник ќе игра во групната фаза, а тоа се најави веќе по првиот меч кога на домашен терен убедливо го совлада тимот на Кирил Лазаров со 37:27.

Пред стартот на возвратниот дуел, РК Алкалоид го доби шампионскиот пехар од ЕХФ Европскиот куп за минатата натпреварувачка сезона 2024/25.

ФОТО | РК Алкалоид го доби пехарот од ЕХФ Европскиот куп за сезоната 2024/25

Во текот на првото полувреме Хановер беше тимот кој го одржуваше резултатот во своја корист, во еден момент од дуелот имаше и „плус шест“ позитива на семафорот (12:6).

Но, Алкалоид пред паузата успеа да направи серија од 8:2 и да дојде до израмнување на 14:14 што даваше надеж дека македонскиот тим може да дојде до поволен резултат против бундеслигашот.

На стартот од вториот дел повторно се одвои гостинот стекнувајќи три гола предност од 17:14. Но, следуваше нов одличен период на Алкалоид кој направи серија од 5:0 за водство од 19:17 за радост на трибините. Нешто подоцна Алкалоид имаше и 20:18, а последната позитива што ја имаше беше во 46 минута од 24:23.

Се влезе во неизвесна завршница во која Германците успеаја да се вратат, Алкалоид доаѓаше неколку пати до израмнување, последното беше во 52 минута (27:27). Во самиот финиш од дуелот, Алкалоид имаше промашен седмерец, вкупно четврти на мечот, а тоа го казни Хановер кој реализираше два гола во низа и така дојде до нова победа во двомечот со Алкалоид.

Кај стрелците во Алкалоид осум погодоци беа дело на Борзаш, седум имаше Тордарсон, а пет Не. Костески.

На спротивната страна Фишер запиша осум голови, а еден помалку имаше неговиот тимски колега Поулсен.

Хановер-Бургдорф во новата сезона од ЕХФ Европската лига ќе игра во групата Г со Фредериција (Данска), Татран Прешов (Словачка) и Савехоф (Шведска).

РК АЛКАЛОИД – ТСВ ХАНОВЕР БУРГДОРФ 28-29 (14-14)
Сала: „Автокоманда“ во Скопје. Судии: Михаил Пирву и Раду Потирниче од Романија. Делегат: Михаил Башев од Бугарија
РК АЛКАЛОИД: Кизиќ (3 одб), Галевски (13 одб), Џонов, Тордарсон 7, Серафимов, Карасманакис 1, Стојковиќ 2, Ѓоргиев 2, Велковски, Симоноски, Ивановски, Костески 5, Петковски, Митев 2, Борзаш 8, Аларов 1
Седмерци: 1/5 Исклучувања: 4 мин.
ТСВ ХАНОВЕР БУРГДОРФ: Бирлем (17 одб), Гаде, Тисие 2, Поулсен 7, Орлов 1, Стенхаузер 5, Михалчик 3, Ахо 1, Штуцке 1, Солстад, Фишер 8, Фајзе, Вебер, Родригез
Седмерци: 3/3 Исклучувања: 12 мин.