Во зоолошката градина во шкотското село Вест Калдер, во областа Вест Лотијан, беше одбележан редок и посебен настан – 39-тиот роденден на најстариот лемур што живее во заробеништво.

Станува збор за машки прстеноопашест лемур по име Стампи, чии години се речиси двојно повисоки од просечниот животен век на неговата врста. Со ова, Стампи официјално го држи светскиот рекорд за најстар лемур во светот.

Стампи е роден во јуни 1986 година во англиската област Сари, а во шкотската зоолошка градина бил префрлен во 2005 година. И покрај напредната возраст, и натаму е во релативно добро здравје – иако има ослабен вид и вкочанетост во зглобовите. Вработените во зоолошката градина се грижат за него со секојдневни терапии за артритис, неделно мерење на тежината и редовно одржување на неговите мирисни жлезди.

Во просек, прстенастоопашестите лемури живеат од 20 до 25 години во заробеништво, а во дивина околу 20 години. Затоа, долговечноста на Стампи претставува вистинско чудо и доказ за извонредната нега што ја добивал со децении.

По повод големиот роденден, вработените му подготвија специјална торта направена од храна за примати, а во славењето му се придружија и неговите потомци – 21-годишниот Ред и 20-годишниот Џулијан.

„Стампи е миленик меѓу посетителите, а најмногу ужива во сончање, грицкање свежи гранчиња од врба и слаток компир“, потврди Гема Варли, главната негувателка во зоолошката градина.

„Да се доживее ваква возраст, повеќе од десет години над просечниот животен век, е извонредно достигнување за која било врста. Стампи без сомнение го заслужува ова признание“, рече еден од уредниците кои го потврдиле рекордот.