Вечерва со натпреварот помеѓу Германија и Шкотска стартуваше 17. Европско првенство во фудбал, а пред натпреварот првенството беше отворено со музичка точка од 15-тина минути.

Натпреварите (51 во текот на турнирот) ќе се играат на десет стадиони во Германија. Играчите најчесто ќе истрчуваат на теренот на Олимпискиот стадион (капацитет од 71.000 седишта) во Берлин, арената во Минхен (66.000) и на стадионот во Дортмунд (62.000) – таму ќе се играат по шест натпревари на ЕУРО 2024 година.

Во Берлин, каде што се наоѓа стадионот со најголем капацитет од сите десет стадиони, се играат финалниот, еден четвртфинален, еден осминафинален натпревар и три натпревари во групната фаза на натпреварувањето. Финалето е закажано за точно еден месец од денешното отворање (14.јули).