Италијанскиот Формула 1 тим Ферари го претстави својот нов болид SF-25, специјално дизајниран за претстојната Голема награда на Мајами. Промените доаѓаат како дел од одбележувањето на првата годишнина од партнерството со технолошкиот гигант „HP“.

На гламурозниот настан во Мајами, во присуство на возачите Шарл Леклер и Луис Хамилтон, како и шефот на тимот Фред Васер, беше презентиран новиот визуелен идентитет на тимот. Посебно внимание привлече новиот изглед на возачките костуми, кои веднаш станаа топ тема во светските спортски медиуми и кај љубителите на Формула 1.

За разлика од традиционалниот црвен дизајн по кој Ферари е препознатлива децении наназад, овојпат доминира белата боја, дополнета со сини детали инспирирани од брендот HP. Црвените елементи не се целосно изоставени, туку стратешки задржани за да ја задржат ДНК-та на тимот.

Од тимот велат дека оваа дизајнерска комбинација го симболизира „американскиот дух“ на трката во Мајами и претставува омаж на историските бели болиди што Ферари ги користеше во одредени периоди од минатото.

Новата естетика не само што претставува маркетиншки потег, туку и потенцира нова ера на соработка меѓу традицијата на Скудерија и технолошката иднина на партнерството со „HP“.

Get a better look at the blue vibe⚪🔵 pic.twitter.com/0lnkTIB3Pa

— Scuderia Ferrari HP (@ScuderiaFerrari) April 30, 2025