Жители на населбата Острово во Аеродром испратија фотографии до редакцијата на „Слободен печат“ од овој викенд на кои „фатени на дело“ се двајца мажи кои од автомобил исфрлаат кабаст отпад на тротоарот покрај контејнерите сместени веднаш до Железничката станица – Скопје.

Оваа локација во изминатите неколку месеци прерасна во мини-депонија каде во неколку наврати се појавуваа огромни ѓубришта од различен тип на отпад кој ја узурпираше зелената површина и целосно го блокираше тротоарот. За жал, навиката на несовесните граѓани продолжи, а викендов дел од нив среде бел ден од гепекот на автомобилот го депонираа кабастиот отпад на оваа локација.

Иако имаше неколку реакции од ЈП „Комунална хигиена – Скопје“ и службите на Општина Аеродром, граѓаните очигледно непречено си продолжуваат „како досега“, а доказ за тоа се овие двајца непознати мажи кои се ослободија од ѓубрето оставајќи го среде тротоар, а во меѓувреме некој на зелената површина ја депонирал и својата стара веце-школка.

ФОТО | Нова минидепонија близу Железничка – двоседи, веце школка, искршени контејнери…