Рап-легендата Маршал Матерс, познат како Еминем, има нова и многу посебна животна улога – дедо. Ќерката на раперот, Хејли Џејд Скот, го доби своето прво дете со сопругот Еван Меклинток и преку името на бебето му оддаде симболична чест на својот татко.

Хејли на својот инстаграм профил-објави фотографии од новороденчето, облечено во плетена дуксерка, пред дрвен знак со неговото целосно име: Елиот Маршал Меклинток. Средното име, Маршал, го носи по својот дедо, чиешто вистинско име е Маршал Брус Матерс Трети.

Фановите веднаш забележаа и една интересна игра на зборови – иницијалите на бебето се E.M.M., што асоцира на славното уметничко име на неговиот дедо – Еминем.

Во последната епизода од третата сезона на нејзиниот поткаст, објавена на 28 февруари, Хејли зборуваше за чувството да станеш родител.

„Толку чудно е да се размислува за тоа… не можам ни да го сфатам целосно. Треба да го запознаам ова човече што го создадов. Како ќе изгледа? Каков ќе му биде карактерот? Чудно е, но многу возбудливо“.

Таа постојано ги известуваше своите следбеници за текот на бременоста со фотографии и искрени објави.

„Толку блиску до запознавање со момчето“, напиша под една од нив, а за Нова година сподели: „Следната година во ова време, сè ќе изгледа поразлично и не можеме да дочекаме“.